Арганізацыя аховы беларуска-расійскай мяжы: Прапановы па стварэнні сістэмы бяспекі ўсходняй мяжы Беларусі: абгрунтаванне неабходнасці, пагрозы і шляхі іх нейтралізацыі

Характар беларуска-расійскіх дачыненняў радыкальна адрозніваецца ад дачыненняў нашай краіны з іншымі суседзямі. Узаемадзеянне Беларусі і Расіі характарызуецца высокай ступенню кааперацыі і адсутнасцю рэальнай аховы мяжы паміж імі. Аднак міждзяржаўныя дачыненні – гэта не статычная з'ява, яны знаходзяцца ў пастаяннай дынаміцы. І тое, што цяпер лічыцца зразумелым і лагічным, ужо праз колькі гадоў можа быць цалкам непрымальным з гледзішча забеспячэння нацыянальных інтарэсаў нашай краіны. Даклад змяшчае апісанне магчымай сістэмы арганізацыі аховы беларуска-расійскай мяжы. У часе працы над дакументам асноўная мэта палягала ў распрацоўцы такога механізму, які дазволіў бы пры мінімальных выдатках забяспечыць максімум аддачы. Другой не менш важнай задачай было забеспячэнне гнуткасці прапанаванай схемы, хуткае нарошчванне яе магчымасцяў пры патрэбе.