Да народнага адзінства праз падзел на сваіх і ворагаў

Грамадства, чыё адзінства абапіраецца на базавы кансэнсус, метадам селекцыі стварыць немагчыма. Няўдалая спроба “верных паслядоўнікаў справы Леніна-Сталіна” сфармаваць новую гістарычную супольнасць “савецкі народ” гэтую выснову выразна праілюстравала. Тое, што дзесяцігоддзямі ўспрымалася ўнутранымі і вонкавымі назіральнікамі як соцыякультурнае цэлае, разбеглася па нацыянальных кватэрах амаль імгненна, і нацыянальныя партыйныя эліты ў гэтым разбяганні ўзялі самы актыўны ўдзел, а ў шмат якіх рэспубліках нават узначалілі яго.