На чые галовы падалі “шышкі” ў 2014 годзе?

За пяць гадоў беларусы перажылі два фінансава-эканамічныя крызісы і ўсю другую палову 2013 г. пражылі ў чаканні трэцяга. Але 2014 г., нягледзячы на нулявы рост даходаў (калі адкінуць снежань), большасць беларусаў успрынялі як год стабільнасці. Сацыёлагі казалі пра пабеду палітычных фактараў над фактарамі эканамічнымі (Анамалія-2014) і галоўную прычыну ўзнікнення анамаліі бачылі ў падзеях ва Украіне і вакол Украіны. Відаць, у канцы года эканамічны фактар зноў пачынае выходзіць на першы план.