Еўрапейскі дыялог пра мадэрнізацыю: мадэль для зборкі

Еўрапейскі дыялог пра мадэрнізацыю Беларусі толькі пачаў сваю працу, але ўжо атрымаў сур'ёзную порцыю крытыкі, як ад беларускіх, гэтак і ад еўрапейскіх экспертаў. Тым не менш, нягледзячы на пэўную неканкрэтнасць і двухсэнсоўнасць задач гэтай ініцыятывы, яна мае шанец стаць эфектыўнай пляцоўкай для камунікацыі самых розных суб'ектаў і прыцягнуць увагу да праблематыкі Беларусі на еўрапейскай палітычнай сцэне. Усё больш відавочна, што ўсходняя палітыка Еўрапейскага саюза не дае таго плёну, якога чакалі яе архітэктары. Усходняе партнёрства, якое афіцыйна пачало адлік у 2009 годзе, зазнае сур'ёзныя цяжкасці. Мэта – наблізіць усходнееўрапейскія краіны і дзяржавы Паўднёвага Каўказа да ЕС паводле прынцыпу палітычных абумоўленасцяў – на сёння не дасягнутая. Асабліва гэта відавочна ў выпадку Беларусі. Зрэшты, калі аналізаваць падзеі двух апошніх гадоў, Украіна таксама ўпэўнена рухаецца да ўзмацнення аўтарытарызму, г. зн. у бок ад Еўрасаюза. Гэтыя тэндэнцыі вядуць да расчаравання еўрапейскіх палітыкаў і страты цікавасці да ўсходняй палітыкі ў цэлым, якая ў блізкай перспектыве бадай не стане "гісторыяй" поспеху і не прынясе палітычных дывідэндаў яе прамоўтарам.