Макраэканамічная палітыка пасля валютнага крызісу: выклікі і перспектывы

Дадзеная аналітычная запіска прысвечана эканамічнай палітыцы ў Беларусі ў перыяд пасля валютнага крызісу 2011 года. У працы паказана, што разам з перадумовамі для стымулюючай палітыкі мела месца і сур'ёзная перашкода - высокія і няўстойлівыя інфляцыйныя чаканні. Гэта абумовіла выбар эканамічных уладаў на карысць сцэнара «стабілізацыйнага» росту ў першым паўгоддзі 2012 года. У гэты перыяд выпуск рос за кошт знешняга попыту, што было неабходна для ўмацавання макраэканамічнай раўнавагі. Важную ролю ў той перыяд адыграў пазітыўны шок - экспарт растваральнікаў. Ён дазволіў забяспечыць рост ВУП у першым паўгоддзі, а таксама забяспечыць перадумовы для даганяючага росту ўнутранага попыту.