Перадумовы дэмакратыі, або Ці быў у Беларусі шанец?

Мяркуючы па ўсім, частыя выказванні беларускіх уладаў пра тое, што “Беларусь не гатовая да дэмакратыі”, – гэта не толькі спосаб ідэалагічнай легітымізацыі, але і шчырае меркаванне значнай часткі палітычнага класа краіны. Гэты тэзіс блізкі да стылізаванай версіі мадэрнізацыйнай тэорыі: толькі з'яўленне ў грамадства “правільнай” сістэмы каштоўнасцяў і інтарэсаў прыводзіць да паспяховай пабудовы капіталізму і дэмакратыі. Альтэрнатыўны тэзіс: “у беларускім аўтарытарызме вінаваты Лукашэнка”, наадварот, ігнаруе ролю структурных перадумоў і надае беларускаму прэзідэнту звышздольнасці Бога з машыны з антычнай трагедыі, які спусціўся на палітычнае поле ў 1994 годзе і змяніў ход палітычнай гісторыі краіны. Дык ці была Беларусь сапраўды не гатовая да дэмакратыі ў пачатку 90-х і ці з'яўляецца беларуская палітычная траекторыя анамальнай?