Далярызацыя і дэдалярызацыя ў Беларусі: фармуляванне парадку дня

Пасля валютнага шоку 2014 г. у Беларусі эканамічныя ўлады зноў абвесцілі кампанію дэдалярызацыі эканомікі. У 2009 г. асноўнай задачай дэдалярызацыі называлася зніжэнне турбулентнасці і ўразлівасці эканомікі да вонкавых шокаў. Для вырашэння пастаўленай задачы ў 2009 г. Нацбанк значна абмежаваў магчымасці разлікаў у замежнай валюце на тэрыторыі краіны (шляхам спынення выдачы новых ліцэнзіяў на ажыццяўленне разлікаў у наяўнай замежнай валюце), задаў імпульс на зніжэнне ставак па фінансавых інструментах у замежнай валюце, а таксама забараніў выдачу крэдытаў у замежнай валюце фізічным асобам. Поспехі палітыкі дэдалярызацыі ўзору 2009–2011 гг. даволі сціплыя: фінансавыя кантракты ў замежнай валюце працягвалі дамінаваць, а практыка цэнаўтварэння ў замежнай валюце і прывязкі да яе заробкаў масава захоўвалася ў нацыянальнай эканоміцы.